Kab’e Kan ma Kab’rakan, jun tbi tnom te lu’len
—¿B’in kyu’ne’ tqal tu’n tok tbi qtnum te Ka’b’e Kan? Atzun txjel tat Tono kye tk’wal akxtaq q’uqle tpen ja te’ iktaqju’ tex q’ij tibaj nin witz te jorsna’l ma txe Chman.
—Ta, toj ax tla’ b’in qune ¿se’ntzun tten tok tb’iju’ qtanum te Ka’b’e Kan?
—B’an, at jun ü’j tz’ib’en ojtxi... ojtxi’, aju’ ü’j lu xjan kyeqe’ qchman. Aju’ ü’j lu tok tb’i te Pop U’j. Tojtzun ü’j aju’ nsichlejsju’ Cabracan. Te’ Cabracan atzun tajwil ma tanum q’aq’, inkyaq, te kxlaqenpach ex te kyajajno’m.
—¡Tajwil kyajajno’m! Bay weye tokwe’ nxob’il se’n ntzaj kyajajno’m chi jun tk’wal tat Tono.
—Tla’ tqal tu’n tu’n kxob’e chiju’ kmam, naqtzun aju’ la’j se’n qa naqch’in xlu’lenju’ tx’o’tx tu’n aju’ Cabracan aju’ twi’ tq’ob’ mux txi tyekchan, qatzun… qa aju’ nintz txi tyekchan nimxix nlu’lenju’ tx’otx’ ex jaku’ qo kyim qkyaqilx.
—Ta, axb’an lane tzaj tla’jene qeye aju’ te xob’ajil, ikju’ ttzaj qlolaj, qoqe’ la’jel tuja.
Q’uqleqe’ txlaj q’aq’ aju’ tat Tono xi tljo’n la’jelteju’ se’ntten tok tbiju’ qtanum te Ka’b’e Kan.
—Extzun q’umlejs, qa tzalu chib’ji’k banpe’ xjal ikju’ che’x mlaj. Aye’ xjal lu otaq tzaj kxob’el tu’ntzun chiqe qa kil toj b’e jun kan kab’e twi’.
—Ay ta, ate’ taj tu’n ttzaj qxob’ile.
—Lanej, chiju’ tat Tono, nomxpetzun tpon tla’jenjs wu’ne.