Okem
Español | Chuj | Kaqchikel | Q'anjob'al | Tz'utujiil
Re rub’eyal samaj k’o pan aq’a’ re’, jun chi ke ri wuj rub’ini’an: Ri Qach’ab’äl pa Tijob’äl. Jun Kisamajib’al ri Tijonela’, Tijoxela’. Re na’oj richin ntz’ib’äx re wuj re’, nab’ey xb’an pa kaji’ ch’ab’äl: Tz’utujil, Ch’orti’, Popti’ chuqa’ Chuj. Wakami xb’an chuqa’ chupam ch’aqa’ chik maya’ ch’ab’äl, achi’el ri Kaqchikel. Ri rub’eyal samaj k’o chupam b’anon pa ruwi’ ri na’oj tz’eton chi rij ri choltzij; ri jalajöj rub’anikil taq tzij e k’o pa qach’ab’äl, chuqa’ chi rij jalajöj na’oj e k’o chupam ri ch’ab’äl achoj chupam xetz’ib’äx wi. Chi jujun chi ke re samaj re’, nok jun samajib’äl richin jalajoj samaj, chuqa’ etz’anem nb’an kik’in ri tijoxela’ kuma ri tijonela’, pa taq tijob’äl richin ri nab’ey taq rupalb’al tijonïk, ri k’o chi nkik’üt ri qach’ab’äl, ri k’o chi nketamaj qach’ab’äl. Xb’an chuqa’ re samaj re’ chi ke, richin k’o ta jun kito’ob’al richin ri kisamaj nkib’än richin nketamaj yech’o pa maya’ ch’ab’äl, toq e k’o chupam ri tijob’äl chuqa’ ke ri’ toq e manaq chi ri’. Rik’in ri ruch’ab’exik, rik’in ri rutz’ib’axik. Chuqa’ ke ri’, rik’in rokisaxik re wuj re’, nsuj ri na’oj richin netamäx ri rukemchi’ ri qach’ab’äl, chuqa’ ke ri’ jalajoj na’oj, jalajoj taq samaj richin ri ütz ruk’utik ri ri qach’ab’äl nqab’än chi re, chuqa’ ke ri’ richin nqaya’ jub’a’ chik ruchuq’a’ ri qach’ab’äl. Konojel ri taq tzijonem, ri taq samaj nqasüj wawe’ xeb’an richin yojtikïr ta yeqokisaj richin yojtzijon, richin nqatz’ib’aj ri qana’oj, ri qana’ojib’al qichin qonojel tijonela’, tijoxela’; chuqa’ rik’in re samaj re’ nqarayib’ej chi ri tijonela’, ri tijoxela’ tikirel ta nkichöb’, nkak’axaj ri kina’oj, ri kina’ojib’äl kitz’ib’an ch’aqa’ chik winaqi’.
Re wuj re’ ch’aron pa waqi’ tanaj. Chi jujun peraj ntikïr el rik’in jun ruxaq wuj akuchi’ nuk’üt pe ri qarayib’al k’atzinel chi nqaq’i’ chupam ri tanaj. K’o k’ïy lema’ tzijonem, jalajöj taq samaj chupam richin nqatojtob’ej ri sik’inïk chupam ri maya’ qach’ab’äl chuqa’ ke ri’ nuya’ q’ij richin nqatojtob’ej yojch’o pa qach’ab’äl. Chi jujun tanaj samaj, jantape’ nuya’ na’oj chi qe richin yojsamajin pa qayonil, chuqa’ pa molaj. Chi kipam re k’isb’äl taq tanaj, yalan k’atzinel chi ri tijonel k’ikin ri tijoxela’ yesamäj pa taq molaj kik’in ri ch’aqa’ chik tijoxela’. Niqarayib’ej ta k’a chi re samaj re’ nto’on ta rik’in ri ketamab’al ri tijonela’ richin nkik’üt ri qach’ab’äl; chi tikirel ta nok jun utziläj samajib’äl richin nkib’än re jun nïm ruq’ij samaj re’ richin ri ruk’utïk ri qach’ab’äl Kaqchikel.
Ir a las versiones por idioma