Antología de cuentos/Cuentos en mam/Qe’ tal teky’ Loẍ

Tqanil

Tzalajb’il toj tchwinqlal Loẍ tu’n jun oyaj xi’ tq’o’n nan Li’y te.

Toj tja nan Li’y b’a’npun/txqan eky’ ati. O’kx tkub’ t-ximan nan Li’y tu’n t-xi tq’o’n jun ttxu eky’ te k’wal Loẍ. Tejtzan tb’et ila’ q’ij, xi’ tka’yin Loẍ, ch’o’ltaq eky’.

Okxtzan paqe ch’o’l ex okx q’o’n jwe’laj jos tjaq’. Nim tzalaj Loẍ tu’n ok chi elitz txqan tal eky’.

Tej tpon amb’il tu’n kyjaw tal eky’ xi ojqelin Loẍ ka’yil jte’ tal otaq chi jaw poq’li. Okxtzan tq’o’n tq’ab’ tjaq’ ttxu eky’ ex ekub’ tajlan: jun, kab’, ox, kyaj, jwe’, qaq, wuq, wajxaq, b’elaj, laj, junlaj, ka’b’laj. Ex ok tka’yin Loẍ qa at ox jos minti’ jaw poq’li. Atzun Loẍ xi’ tq’uma’n te nan Li’y, qa minti' otaq chi jaw b’aj kykyaqil jos. Nim tzalaj Loẍ kyi’jqe’ tal eky’ ex b’aj ok tka’yin tu’n kych’iy kykyaqil. Tqanil

Luis Francisco Ramírez Ortiz
San Sebastián, Huehuetenango