Antología de cuentos/Cuentos en k'iche'/Sutz’ sachanel

Ub’antajik tzij

Jela’ pa ri komon Xe’wenab’aj kel wi jun ak’al ub’i’ a Ti’x, ri ak’al sib’alaj uk’atik kayuq’unik, ek’o job’ uchij, jun ukej, jun uwakax, xuquje’ jun utz’i’ ub’i a Pa’tz.

Nojel q’ij ri a Ti’x kuyuq’uj le taq awaj jela’ pa nik’aj ja’, chirij ri juyub’ ub’i’ Tena’. Jun xe’qal xub’ij che ri unan, chweq kinb’e pa yuq’ chirij Tena’, aq’ab’ kawalij la che ub’anik le nuwa’, nuk’atan, utz ri wal xcha’ che. Aq’ab’ xwalijik le unan le ala, xub’an ri ulej, jun saqmol pa ri xot, xutzir uwa ri a Ti’x.

Xuk’asuj le ral: - Ti’x, Ti’x, chatwalijoq, xutzir ri awa’ xcha che. Xwaljik xub’ij che ri unan: - man kintij taj ri nuwa, pisa pa jun sut, ruk’ le nuk’atan, xuquje’ kyala b’ik ri uwa le nutz’i’. -Utz ri wal, xcha’ ri unan, xuya’ b’ik le uwa pa ri uchim.

Ri a Ti’x xeresaj ri awajib’, xb’e pa yuq’. Are taq xok’ow, chi uxe’ le juyub’ ub’i Tena’; kate’ xrilo xpakak jun sutz’, le a Ati’x man xuna’ taj xutzaq kan le uwa.

Are taq xopan naqaj che le ja’, jawi kayuq’un wi, k’ate’ xrilo man k’ota chik ri apa’tz. Te xuna’o man reqam ta ri uchim, aaa, aaa, sib’alaj xb’isonik xe’uyakan ri uchij, chila’, xuquje’ xuxim kan ri taq awaj, xtzalij b’ik che utzukuxik le uchim rech uwa.

Sib’alaj uxim rib’ xb’ek pa ri b’e, rumal che xaq utukel. Naj k’owi apanoq, k’ate xrilo kotol ri a Pa’tz pa ri b’e jupul pwi’ ri uchim. Are taq xrilo’, ri a Ti’x sib’alaj xkikotik, xuquje’ ri alaj a Pa’tz sib’alaj xusilab’aj uje’, aninaq xb’e che uk’ulaxik le rajaw, kusutusa uje’.

We ala sib’alaj xkikotik xuriqa’ ri uchim chajital rumal ri laj a Pa’tz. Xetzalij b’i kuk’ le awaj ruk’ kikotemal.

Esteban Velásquez Vicente
Momostenango, Totonicapán

Narración de las acciones que les suceden a unos personajes en un espacio y un tiempo determinados.