Qanb’il qman jb’al kyu’n qxe’chil

Archivo:Antología de cuentos II - identificador en mam - horizontal.png

Tqanil

Nkub’ kyyolin nmana ex ntxuya. Ajo ojtxi, ilti’j nchi jaw qxjalil twi’ witz. In che’x qanil tu’n tetz qman jb’al. Tu’n tzaj qman jb’al kyib’aj kykyaqil awal twitz qtxu tx’otx’.

Jun maj, mixti’ etz qman jb’al tib’aj awal. Otaq chi jaw ch’umj ex at otaq chi jaw tzqij. B’e’x i jaw b’isin kykyaqil xjal. Tejo ikyjo, jaw kychmo’n kyib’. Ex sich’b’il kyi’j q’a, txin, tij xjal ex qe’ ajq’ij.

Pon kanin amb’il tu’n kyjax kykyaqil xjal twi’ witz. Tej ttzaj oxe te qale, oxix chi tilin xjal kyjax. Nchi yolinx tej kyjapin. Noq ayonqe’. Junjun xi’ tq’o’n toyaj kye ajq’ij. Noqx jaw chmet txqan oyaj.

Xi’ qe aq’untl kyu’n ajq’ij. Xi’ kyqanin te tanmi kya’j, te tanmi tx’otx’, kye kykyaqil at tanmi. Tzunx nchi yolin tuk’il Qman ex Qtxu. Tzunx nchi kub’san twitz te Qajawil. Noqwitla tz’el tpa’n tib’ja aju ma tzyunte qman jb’al. Tu’nwitla ttzaj qman jb’al.

Npon b’aj aq’untl, otaq tzaj q’aqix muj. Mi’nx nchi ajtz qa mi’n s-etz qman jb’al. Tzunx nchi kub’sanx. Toj kywitz noqwitla ja’ku tzaj qman jb’al. Tej ikyjo, tzaj junjun tqan qman jb’al. B’e’x i jaw tzalaj. Xi’ kyq’o’n chjonte te Qajawil tu’n b’e’x i tzaj b’i’n.

Mario Fidel Marroquín Agustín
Comitancillo, San Marcos