Ri alaj tz’unun

Ub’antajik tzij

Jun aq’ab’il k’o ri ali Na’ chi uwach ri rachoch. Utaqem kuja’j ri ukotz’i’j, xaq k’ate’ karopopik le laj tz’unun, xtzaq chuwach.

Ri ali Na’ xrilo xuyak uloq le laj chikop, kuk’ab’ upuchi’, ri ali xuk’ama’ juqub’* joron, xuya’ pa uchi’, le laj tz’unun xub’iq’ b’ik, ri ali xb’isonik xk’am wa’ xcha’ xuchip b’ik, xuya’ kan pa uwi’ jun je’lalaj roxox.

Xtak’i ruk’ xuchajij, te k’u ri’ xaq k’ate xrilo chi ri laj tz’unun xrapapik, xrapapik. Ri ali Na’ kaki’kotik are taq xrilo chi le laj tz’unun xb’e pa uwi’ le je’l taq kotz’i’j.

Lilian Maribel Calderón
Zunil, Quetzaltenango